Өскеменнің Б.Александров атындағы спорт сарайында жастар арасында шайбалы хоккейден «Қысқы спорт фест» турнирі басталды, деп хабарлайды F16.kz.
Екі күнге жоспарланған дүбірлі жарысты өткізуге Шығыс Қазақстан облысы прокуратурасы мен өңір басшылығы мұрындық болды. Мақсат – салауатты өмір салтын насихаттау, бұқаралық спорттың дамуына ықпал ету және жас таланттарды қолдау.
Қаламызда осындай дүбірлі бәсекенің өтуі жас спортшылардың бойына қанат бітіреді. Өйткені шайбалы хоккей біздің өңірде негізгі спорт түрінің бірі саналады. Осы мұз айдынынан еліміздің атын әлемге әйгілеген талай-талай мықты спортшылар түлеп ұшқан. Бүгінгі жарысқа қатысып жатқан жас хоккейшілердің арасынан Қазақстанның көк байрағын биікте желбірететін талантты спортшылар шығатынына сенімдімін. Әлемдік ареналардағы үлкен жеңістер осындай турнирлерден басталады. Жарыс жақсы өтсін, – деді облыс әкімінің бірінші орынбасары Жақсылық Омар.
Турнирге екі жас ерекшелігі бойынша (2008–2010 жж. және 2012–2014 жж. туғандар) сегіз команда қатысып жатыр. Олардың қатарында «Торнадо», «Локомотив», «Титан», «Устинка», «Ульбинка», «Кедр» және «КШТ» командалары бар.
Бұл жарысқа сайдың тасындай іріктелген кіл мықтылар, нағыз шеберлер жиылды. Сіздерді жеңімпаз деп сеніммен айта аламын, өйткені бәріңіз салауатты өмір салтын ұстанасыздар. Көп тер төгіп, талмай еңбектенесіздер. Қазақстан хоккейінің отаны – Өскемен. Өйткені даңқты хоккейшілер шоғыры осы өңірден шыққан. Бүгінгі жарыс достық рәуіште, адал бәсекелестік жағдайында өтуіне тілектеспін. Шын мықты жеңіске жетсін, – деді облыс прокурорының бірінші орынбасары Ерлан Бұланбаев.
Дүбірлі бәсекенің ашылу салтанатына жарысқа демеушілік еткен AN group компаниясының өкілдері де қатысып, спортшыларға тілегін жеткізді.
«Созвездие» синхронды сырғанау тобы өнер көрсетті.
