Шығыс Қазақстан облысында құрылыс жұмыстары қатаң бақылауға алынды. Былтыр жоспардан тыс тексерулер саны 40 пайызға артып, салынған айыппұлдардың жалпы сомасы 180 миллион теңгеге жетті. Бұл туралы ШҚО мемлекеттік сәулет-құрылыс бақылау басқармасы басшысының орынбасары Самат Қайырдинов айтты, деп хабарлайды F16.kz.
Оның ішінде жеке тұрғын үй құрылысы да басты назарға алынған. Қазір облыс орталығында жеке инвестициялар есебінен 36 тұрғын үй кешені салынып жатыр. Былтыр бұл нысандарға сегіз жоспардан тыс тексеру жүргізілген.
Оның бірі — Emeralds тұрғын үй кешені. Аталған компания облыс тұрғындарына 1,8 млрд теңге шығын шектіріп, 103 үлескерді тақырға отырғызып кетті. Компания басшыларына қатысты қылмыстық іс қозғалып, сот үкімімен олар бас бостандығынан айырылды. Қазіргі уақытта құрылыс жұмыстары толықтай тоқтап тұр. Нысанды аяқтау мәселесі арнайы құрылған комиссияда қаралуда, – деді Самат Қайырдинов.
Ал екінші Astoria тұрғын үй кешенінде құрылыс жұмыстары қайта жанданған. Жобаға жаңа инвестор тартылып, бүгінде ғимараттың қаңқасы тұрғызылып жатыр. Аталған тұрғын үй кешенін 2026 жылдың екінші тоқсанында пайдалануға беру жоспарланған.
Айта кетейік былтыр лицензия талаптарын бұзған құрылыс ұйымдарына қатысты 156 әкімшілік іс қозғалып, 28,7 миллион теңге көлемінде айыппұл салынып, құрылысқа берілген 7 лицензияның күші жойылды.
