ШҚО құрылыс, сәулет және қала құрылысы басқармасы 2026-2028 жылдары өңірде бірқатар ауқымды жобаларды жүзеге асырмақ. Бұл туралы облыстық мәслихаттың кезектен тыс 27-інші сессиясында белгілі болды, деп хабарлайды F16.kz.
Жиын барысында облыстық экономика және бюджеттік жоспарлау басқармасының басшысы Нұрсұлтан Маратов жоспарланған жұмыстарға бюджеттен қанша қаржы қарастырылатынын айтты.
Облыс орталығында волейбол орталығының құрылысын бастауға 1 млрд теңге, Риддер қаласындағы дене шынықтыру-сауықтыру кешенінің құрылысына 732,3 млн теңге қарастырылады. Риддер қаласы Лесное ауылы аумағында республикалық спорттық-оңалту орталығының жобалық-сметалық құжаттамасын әзірлеуге 104,6 млн теңге бөлу көзделген, — деді Нұрсұлтан Маратов.
Айта кетейік, облыстық мәслихаттың кезектен тыс 27-інші сессиясында 2026–2028 жылдарға арналған бюджетке өзгерістер енгізу жобасы қаралды. Енгізілген түзетулер инфрақұрылымды жаңғыртуға, мәдениет, білім және спорт саласындағы жаңа нысандардың құрлысына және жөндеу жұмыстарына қаржы бөліп, өңірдің әлеуметтік-экономикалық дамуын жеделдетуге әсер етеді.
