Еліміздегі ішімдіксіз ауылдар қатарына Зайсан ауданына қарасты Қуаныш ауылы да қосылды. Бұл туралы облыстық полиция департаменті мәлім етті, деп хабарлайды F16.kz.
Аталған елді мекен Зайсан ауданы бойынша «Ішімдіксіз ауыл» мәртебесін алған үшінші ауыл. Бұл бастама құқық бұзушылықтардың, оның ішінде тұрмыстық зорлық-зомбылықтың алдын алуға, заңға бағынатын мінез-құлықты қалыптастыруға және қоғамдық тәртіпті нығайтуға бағытталған.
Қазіргі уақытта Қуаныш ауылында 80-нен астам түтін бар, шамамен 370 адам тұрады.
Ауыл тұрғындарының айтуынша, бұл — ортақ жауапкершілік пен саналы таңдау нәтижесі.
Бүгінде облыс бойынша ресми түрде 22 ауыл ішімдіктен бас тартқан. Бұл өңірде құқық бұзушылықтардың алдын алу және қоғамдық қауіпсіздікті нығайту бағытында жүйелі әрі кешенді жұмыстардың жүргізіліп жатқанын көрсетеді.
