«AMANAT» партиясының «Ауыл аманаты» жобасы аясында Тарбағатай ауданы Ақжар ауылында жеке кәсіпкер көлік жуу нысанын ашты, деп хабарлайды F16.kz.
Кәсіпкер 2,5 пайыздық жеңілдетілген несие бағдарламасы арқылы 6 700 000 теңге көлемінде қаржы алған.
«Ауыл аманаты» жобасы ауыл тұрғындары үшін үлкен мүмкіндік деп санаймын. 2,5 пайызбен берілген жеңілдетілген несие өз ісімді бастауға және оны заманауи талаптарға сай дамытуға жол ашты. Мемлекет пен партия тарапынан көрсетілген қолдаудың арқасында кәсібімді кеңейтіп, ауылдастарымды сапалы қызметпен қамтамасыз етіп отырмын. Алдағы уақытта қосымша жұмыс орындарын ашу жоспарда бар, – дейді кәсіпкер Құралай Масалимова.
Бүгінде жаңа кәсіпкерлік нысан толық іске қосылып, Ақжар ауылының тұрғындарына сапалы әрі қолжетімді қызмет көрсетуде. Ауыл ішінде осындай қызмет түрінің ашылуы тұрғындар үшін уақыт үнемдеуге, қолайлы жағдай жасауға және жергілікті экономиканың дамуына оң әсерін тигізуде.
