Теміржол бойындағы қауіпсіздік талаптарын бұзу салдарынан былтыр Өскемен қаласы бойынша төрт жазатайым оқиға болған. Ал 2026 жылдың басынан бері бір оқыс оқиға тіркелді, деп хабарлайды F16.kz.
Теміржол жоғары қауіп көзі болып саналады. Пойыздардың жоғары жылдамдықпен жүруі, электр желілерінің болуы және арнайы техникалық аймақтардың көптігі теміржол маңында қауіпсіздік ережелерін қатаң сақтауды талап етеді.
Алтай станциясы көліктегі полиция бөлімшесінің басшысы, полиция майоры Аслан Әбілмажиновтың айтуынша, жазатайым оқиғалардың басым бөлігі азаматтардың, әсіресе балалар мен жасөспірімдердің қауіпсіздік талаптарын елемеуінен туындайды. Теміржолды белгіленбеген жерден кесіп өту, пойыз қозғалысына жақын жүру, рельс бойында ойнау немесе теміржол инфрақұрылымына шығу адам өмірі мен денсаулығына үлкен қауіп төндіреді. Сондықтан ата-аналар балаларға теміржолдың қауіпті аймақ екенін түсіндіріп, қауіпсіз мінез-құлық ережелерін үнемі ескертіп отыруы қажет.
Теміржолдағы қауіпсіздік мәдениетін қалыптастыру – тек құқық қорғау немесе көлік саласының міндеті емес, бұл бүкіл қоғамның ортақ жауапкершілігі. Азаматтарды ақпараттандыру, алдын алу шараларын күшейту, түсіндіру жұмыстарын жүргізу жазатайым оқиғалардың санын азайтуға мүмкіндік береді. Біздің негізгі міндет – азаматтардың қауіпсіздік мәселелері мен белгіленген ережелерді сақтауға жауапкершілікпен қарауын қалыптастыру. «Заң мен тәртіп» қағидаты – өзін және айналасындағылардың қауіпсіздігін ойлайтын әрбір адамның міндеті. Осы қағидатты ұстану арқылы ғана біз теміржолдағы қауіпсіздікті қамтамасыз ете аламыз, – дейді Аслан Әбілмажинов.
Оның айтуынша, Өскемен қаласы бойынша теміржолдағы қауіпсіздік талаптарының сақталмауы салдарынан қайғылы жағдайлар әлі де азаймай келеді.
Былтыр теміржол бойында адамдарды қағып кеткен төрт жазатайым оқиға болды. Ал 2026 жылдың басынан бері мұндай 1 дерек тіркелді. Бұл жағдайлар теміржол маңындағы қауіпсіздік мәселесінің әлі де өзекті екенін көрсетеді, – деп қосты полиция майоры.
Көліктегі полиция қызметкерлері әрбір азамат теміржол маңында сақтық танытып, белгіленген талаптарды қатаң орындауға тиіс екенін еске салады. Өйткені қауіпсіздік – әр адамның өз өміріне және айналасындағыларға деген жауапкершілігінен басталады.
