Шығыс Қазақстан облысы өткен жылды әлеуметтік-экономикалық көрсеткіштер бойынша оң нәтижелермен аяқтап, өңір экономикасының біртіндеп тұрақтанып келе жатқанын паш етті. Өнеркәсіп өндірісінің нақты көлем индексі жыл басында 80,3% болса, жыл соңында 95% жетіп, даму қарқынының сенімділігін көрсетті.
Өткен жылы өңірде 3,3 трлн теңгенің өнеркәсіп өнімі өндірілді, оның ішінде өңдеу өнеркәсібінің үлесі 2,9 трлн теңгені құрады. Қысқа мерзімді экономикалық индикатор 11,8% өсіп, желтоқсан айында 99,1% жетті. Ал жалпы өңірлік өнімнің нақты көрсеткіштері 2026 жылдың бірінші жартыжылдығында 100% асатын деңгейде болмақ.
Ауыл шаруашылығы саласы ШҚО экономикасының тұрақты өсімін қамтамасыз етіп отыр. Жалпы өнім көлемі 554,6 млрд теңгеге жетіп, нақты көлем индексі 102% құрады.
Шығыс Қазақстан облысы бал өндірісі бойынша республикада көш бастап тұр. Өңір елдегі жалпы бал өнімінің 50% астамын қамтамасыз етеді. Өткен жылы шамамен 3 мың тонна бал өндіріліп, бұл көрсеткіш алдыңғы жылмен салыстырғанда 1,5 есе артып отыр. Бал шаруашылығы өңір үшін экспортқа бағытталған маңызды салаға айналып, халықаралық серіктестерді қызықтыруда. Мәселен, екі ірі венгриялық компания ШҚО-дағы бал өндірушілермен ынтымақтасуға мүдделі. «Пасека Буньковых» шаруашылығы «Экспортты акселерация 2025» бағдарламасына қатысып, ал «Сан Би Алтай» ЖШС Еуропа комиссиясының тізіміне енгізіліп, 27 елге ресми экспортқа шыққан алғашқы қазақстандық кәсіпорын атанды.
Өңір аквамәдениет саласында да алдыңғы қатарда. 2025 жылы 2,5 мың тонна тауарлық балық өндіру жоспарланған, бұл өткен кезеңмен салыстырғанда екі есе көп. Сонымен қатар, өткен жылдың көктем айында Қара Ертіс өзеніне 51 мыңнан астам сібір тасбақасы жіберілді, ал балық өсіру көлемі 2,5 есе артты.
Экономиканы одан әрі дамытуды қолдау мақсатында облысқа 838,1 млрд теңге инвестиция тартылып, нақты көлем индексі 105,2% құрады. Инвестициялардың жартысы Өскемен қаласына бағытталса, негізгі қаржы өнеркәсіп, жылжымайтын мүлік, көлік және қоймалау, денсаулық сақтау салаларына жұмсалды.
Құрылыс саласында 458,8 млрд теңгенің жұмысы атқарылып, 407,4 мың шаршы метр тұрғын үй пайдалануға берілді. Сауда айналымы 2,5 трлн теңгеге жетіп, бөлшек және көтерме саудада өсім байқалды. Сыртқы сауда айналымы 4,4 млрд АҚШ долларын құрап, негізгі серіктестер қатарында Ресей, Қытай, Қырғызстан және Түркия бар.
Әлеуметтік салада 28,7 мың жаңа жұмыс орны құрылып, жұмыссыздық деңгейі 4,6% аспайды. Инфрақұрылымды дамыту аясында 856 шақырым автожол жөнделіп, облыс халқының орталықтандырылған сумен қамтылуы 100% жетті.
Облыста туризмді дамыту, ауыл шаруашылығы өнімдерін қайта өңдеу, өнеркәсіп өндірісін терең жаңғырту және цифрландыру арқылы экономиканы әртараптандыру жұмыстары жалғасуда. Бұл бағыттар Мемлекет басшысының 2029 жылға дейін ел экономикасын екі есе ұлғайту жөніндегі тапсырмасымен тікелей үндеседі, ал ШҚО экономикасының серпіні оны жүзеге асыруға сенімді жол ашуда.
