Шығыс Қазақстан облысында азық-түлік қауіпсіздігін қамтамасыз ету жұмысы күшейтілді, деп хабарлайды F16.kz.
Үкіметтің кеңейтілген отырысында Қазақстан Президенті Қасым-Жомарт Тоқаев агроөнеркәсіп кешенін тиімді дамыту, азық-түлік қауіпсіздігін арттыру және саланы цифрландыру бойынша нақты тапсырмалар берді.
ШҚО ауыл шаруашылығы басқармасының дерегінше, 2025 жылдың қорытындысы бойынша облыста 29 негізгі азық-түлік түрінің 14-імен халық 100 пайыз қамтылған. Нан мен ұн өнімдері, еттің негізгі түрлері, балық, өсімдік майы, жарма, картоп пен көкөніс жеткілікті. Қант, күріш және тұз сияқты кейбір өнімдер бойынша өзге өңірлерге тәуелділік бар.
Аймақтағы тамақ және қайта өңдеу өнеркәсібі толық жұмыс істеп тұр. Ет, сүт, май, ұн-жарма, нан пісіру және балық өндірісі жолға қойылған. Экспорт әлеуеті де артқан: 2025 жылдың 11 айында АӨК өнімдерінің экспорты 367,3 млн АҚШ долларына тең болып, 2024 жылғы көрсеткіштен 20,5 пайызға өскен. Оның 68 пайызы – қайта өңделген өнімдер.
Ірі инвестициялық жобалар да жүзеге асырылып жатыр. Өскемен қаласында жылына 169 мың тонна өнім өңдеуге қуаты жеткілікті «Алтай Май» ЖШС-ның май зауыты іске қосылды. Сондай-ақ сүт саласындағы кәсіпорындар жаңғыртылып, жаңа өндірістік нысандар салынып жатыр.
Мал шаруашылығында да өсім бар. Сүт өндірісі 9 пайызға артып, 260,5 мың тоннаға жетті. Ірі қара мен жылқы саны көбейген. ШҚО — сүт саласын дамыту бойынша елдегі көшбасшы өңірлердің бірі. Биыл «Ауыл аманаты» бағдарламасы аясында 31 ауыл шаруашылығы кооперативі құрылмақ. Сонымен қатар субсидиялау жүйесін цифрландыру және мемлекеттік қолдауды ашық жүргізу жұмыстары жалғасады.
Шығыс Қазақстан облысы Мемлекет басшысының тапсырмаларын жүйелі түрде жүзеге асырып, ауыл шаруашылығы өнімдерін терең өңдеу мен АӨК тиімділігін арттыруға күш салып келеді.
