Шығыс Қазақстан облысында ақпараттық жүйелер бірыңғай архитектураға көшіріліп жатыр, деп хабарлайды F16.kz.
Президент цифрландыру мен жасанды интеллектіні мемлекеттік саясаттың басым бағыты ретінде бекітті. Осы тапсырма аясында өңірде жүйелі жұмыс қолға алынды. Жүйелерді интеграциялау деректердің сапасын арттыруға, функциялардың қайталануын жоюға, ақпараттық қауіпсіздікті күшейтуге және шығындарды азайтуға мүмкіндік береді.
Цифрлық трансформация картасы бойынша тоғыз басқармада 116 реестр мен 247 есеп цифрландырылды. Мамандардың жұмыс уақыты 30 пайызға үнемделіп, деректердің өзектілігі мен сапасы бақылауға алынды.
Негізгі құралдардың бірі – Өңірлік талдау орталығы. Ол тұрғын үй-коммуналдық шаруашылық, экология, қауіпсіздік және азаматтардың өтініштерін бақылап, төтенше жағдайлар кезінде штабтық алаң ретінде қызмет атқарады.
ТҮКШ саласында 23 жылу көзіне онлайн-мониторинг енгізілген. Деректер әр минут сайын жаңартылып, 6 мыңнан астам бейнекамера, ауаның сапасы мен су тасқынын бақылауға арналған автоматтандырылған бекеттер, бейнеаналитика және жасанды интеллект элементтері қолданылады.
Интернет инфрақұрылымын дамыту бағытында да нақты нәтиже бар: 2025 жылы 53 ауыл интернетке қосылды, ал 2026 жылдың басынан бері тағы 19 елді мекен қамтылды. Қазір облыс халқының 98,5 пайызы байланыспен қамтамасыз етілген. 67 шағын елді мекенді жылдың соңына дейін қосу жоспарланып отыр.
Кадр даярлау мақсатында Д.Серікбаев атындағы ШҚТУ жанынан Tomorrow School жобасы іске қосылды. Жоба цифрлық экономика мен жасанды интеллект саласында өңірлік мамандарды даярлауға бағытталған.
Өңірде цифрлық шешімдерді дамытуға қажетті база қалыптасты. Келесі кезең – деректер сапасын арттыру және оларды басқарушылық шешімдер қабылдауда белсенді пайдалану.
