ШҚО полиция департаментінде Ауған соғысының ардагерлеріне құрмет көрсетілді, деп хабарлайды F16.kz.
Шығыс Қазақстан облысында Кеңес әскерлерінің Ауғанстан жерінен шығарылған күніне арналған іс-шаралар өтті. Еске алу күні Өскемен қаласындағы Славский жағалауында орналасқан Ауған соғысында қаза тапқан жауынгерлер монументіне гүл шоқтарын қою рәсімінен басталды. Жиналғандар соғыстан қайтпаған боздақтардың рухына тағзым етіп, оларды бір минуттық үнсіздікпен еске алды.
Біз үшін сол бір жылдарды ешқашан ұмытпаймыз. Полиция департаменті тарапынан көрсетіліп жатқан қолдау — бұл жай ғана көңіл бөлу емес, бұл өз борышын адал атқарған жауынгерлерге деген шынайы құрметтің белгісі, — деп атап өтті ШҚО ПД жанындағы Ауған соғысы ардагерлері кеңесінің төрағасы Қыдырғазы Баймұратов.
Тағылымды кездесу полиция департаментінің мұражайында жалғасын тауып, онда ішкі істер органдарының ардагерлері мен қазіргі қызметкерлер бас қосты. Салтанатты жиынға сол сұрапыл соғыстың отты жолдарынан өткен 17 ІІО ардагері қатысты.
