Астанада этномәдени бірлестіктердің «Жаңа Конституция – әділетті және прогрессивті Қазақстанның берік негізі» атты жалпыреспубликалық форумы өтті. Маңызды басқосу ел дамуының жаңа кезеңіне арналған мазмұнды пікір алмасу алаңына айналды.
Алқалы жиынға Қазақстан халқы Ассамблеясы төрағасының орынбасары Марат Әзілханов, Парламент депутаттары, «Әділетті және прогрессивті Қазақстанның халықтық Конституциясы үшін!» жалпыұлттық коалициясының мүшелері, республикалық және өңірлік этномәдени бірлестіктердің жетекшілері мен белсенділері, ҚХА-ның қоғамдық құрылымдары, «Ассамблея жастары», сарапшылар қауымдастығы өкілдері қатысты. Өңірлердегі Достық үйлері онлайн форматта қосылып, форум жұмысының республикалық деңгейде кең қамтылуын қамтамасыз етті.
Жиын барысында жаңа Конституция жобасының негізгі ережелері талқыланып, оның мемлекет дамуы үшін стратегиялық маңызы атап өтілді. Қатысушылар қоғамдық келісімді сақтау, бірлік пен ынтымақты нығайту, этносаралық татулықты дамыту – елдің тұрақты әрі жүйелі дамуының басты кепілі екенін ерекше атап өтті.
Форумда 15 наурызда өтетін республикалық референдумға айрықша назар аударылды. Жаңа Конституцияны қабылдау – Қазақстанның саяси жүйесін жаңғыртып, құқықтық негіздерін ұзақ мерзімге нығайтатын тарихи қадам ретінде бағаланды.
Спикерлердің айтуынша, жаңа Конституция жобасы кең көлемді қоғамдық талқылау нәтижесінде әзірленген. Бұл – ел азаматтарының Негізгі заңды қалыптастыруға белсенді түрде қатысқанын көрсетеді.
Жиын соңында қатысушылар жаңа Конституция жобасын және Мемлекет басшысы бастамашылық еткен реформаларды бірауыздан қолдайтындарын білдірді.
Ассамблея активі алдағы уақытта да қоғаммен ашық диалог жүргізуге және халыққа жан-жақты ақпараттық-түсіндіру жұмыстарын жалғастыруға дайын екенін жеткізді.
Сондай-ақ барша қазақстандықтарды 2026 жылғы 15 наурызда өтетін республикалық референдумға белсенді қатысып, азаматтық жауапкершілік танытуға шақырды.
Бұл форум – ел болашағына бейжай қарамайтын азаматтардың ортақ ұстанымын айқындаған маңызды қоғамдық алаң болды.
