Шығыс Қазақстан облыстық драма және оперетта театрында SHYGYS САХНА FEST I театрішілік фестивалі басталды. Алғаш рет ұйымдастырылған айтулы шарада театр құрамындағы төрт шығармашылық труппа өзара тәжірибе алмасып, кәсіби бәсекеге түседі, деп хабарлайды F16.kz.
Өзіндік көркемдік мектебі және сахналық ерекшелігі бар әр турппаны білікті театртанушы, театр сыншылары бағалайды.
Фестиваль — жай ғана спектакльдер байқауы емес. Бұл — ішкі кәсіби өсуге, қойылымдарды сараптауға және театрдың стратегиялық дамуына бағытталған маңызды алаң. Фестиваль бағдарламасы аясында түрлі жанрдағы қойылымдар көрсетіліп, театр өнерінің көпқырлы болмысы айқын көрініс табады. Арнайы шақырылған театртанушылар мен сыншылар тәуелсіз баға беріп, 14 номинация бойынша үздіктерді анықтайды, — деп атап өтті облыстық мәдениет басқармасы мәдениет және өнер бөлімінің басшысы Ләззат Жұмашева.
Фестиваль шымылдығы кеше Т.Тоқтаров көшесі, 47а мекенжайында орналасқан бұрынғы театр ғимаратында Б.Андерссон мен Б.Ульвеустің «Mamma mia» музыкалық спектаклімен ашылды.
Бүгін фестиваль үш бірдей қойылыммен жалғасады. Сәтбаев даңғылы, 55 мекенжайындағы облыстық драма және оперетта театрынды 11.00-де қазақ театры Иран-Ғайыптың «Алтын-ажал» қойылымын сахналаса, сағат 15.00-де жастар театры С.Лобозеровтың «Ауылдағы оқиға» комедиясын және кешкі сағат 19.00-де Ә.Қаңтарбайдың «Көзімді жұмсам да көрем сені…» лирикалық драмасын ұсынады.
