Бүгін Шығыс Қазақстан облысының әкімі Нұрымбет Сақтағанов Қырғыз Республикасының Қазақстандағы Төтенше және Өкілетті елшісі Құдайберген Базарбаевпен кездесті. Кездесуде екіжақты әріптестікті, аймақаралық ынтымақтастықты дамытудың жаңа мүмкіндіктері талқыланды, деп хабарлайды F16.kz порталы облыс әкімінің баспасөз қызметіне сілтеме жасап.
Бауырлас елдеріміздің арасында тығыз қарым-қатынас орнап, өзара байланыс күшейіп келеді. Оның ішінде Шығыс Қазақстан үшін Қырғыз елі сауда-саттық, өндіріс, ауыл шаруашылығы, туризм сынды салаларда маңызды серіктес. Әріптестікті одан сайын күшейте түсуге әзірміз, — деді Нұрымбет Сақтағанов.
Құдайберген Базарбаев өз сөзінде аймақтың туристік әлеуетімен танысу үшін Марқакөл мен Катонқарағай аудандарында болып, табиғатына тамсанып қайтқанын жеткізді. Сондай-ақ өңірге Қырғызстаннан ауыл шаруашылығы өнімдерін жеткізуге қатысты ұсыныстарын айтты.
Айта кетейік, 2025 жылы Шығыс Қазақстан облысы мен Қырғыз Республикасы арасындағы тауар айналымы 534 213 мың АҚШ доллары көлемінде болды. Бұл көрсеткіш 2024 жылғы кезеңімен салыстырғанда 35 пайызға жоғары. Оның ішінде экспорт көлемі — 360 млн доллардан асса, ал импорт 170 млн долларға жетті.
