Биылғы сәуірден бастап мерзімі өткен жүргізуші куәлігін онлайн ауыстыруға болады. Бұл қызметке eGov.kz порталы мен eGov Mobile қосымшасы арқылы қол жеткізуге болады, деп хабарлайды F16.kz.
Бұған дейін онлайн ауыстыру тек қолданыстағы, жоғалған не аты-жөні өзгерген куәліктерге рұқсат етілген еді. Жаңашылдық барлық санаттағы куәліктерге қатысты. Мерзімі өткен құжатты ауыстыру үшін міндетті медициналық тексеруден өту қажет, ал мерзімінен бұрын жаңартқанда бұл талап қойылмайды. Медициналық деректер жүйеден автоматты түрде жүктеледі. Қызмет көрсету уақыты – 60 минут. Мемлекеттік баж салығы – 1,25 АЕК (2026 жылы 5406 теңге). Өтінім eGov.kz немесе eGov Mobile арқылы беріліп, дайын құжатты таңдалған ХҚКО-дан жеке куәлікпен алуға болады. Жүйе айыппұлдардың бар-жоғын тексереді: 30 күннен асқан төленбеген айыппұл болса, куәлік берілмейді. Егер деректер цифрландырылмаған болса, ХҚКО-ға жүгіну қажет.
Қазақстандықтар сәуірден бастап жүргізуші куәлігін оның жарамдылық мерзімі аяқталғаннан кейін де eGov.kz порталы және eGov Mobile мобильді қосымшасы арқылы ауыстыра алады, – деп хабарлады Жасанды интеллект және цифрлық даму министрлігінің баспасөз қызметі.
