Шығыс Қазақстан облысының әкімі Нұрымбет Сақтағанов жауапты орындарға қалада қаптап жүрген бұралқы иттер мәселесін шешуді тапсырды, деп хабарлайды F16.kz.
Кейінгі кезде Өскеменде иесіз иттер көбейді. Тұрғындар әлеуметтік желілерде дабыл қағып, балаларының өміріне алаңдайтынын жиі жазады. Көп жылдан бері түйіні тарқатылмай келе жатқан проблемаға аймақ басшысы назар аударды.
Бір жыл емес, екі жыл емес, он жыл емес, иесіз иттердің мәселесін шешуді қашанға дейін созып жүресіздер?! Тұрғындардың, әсіресе балалардың өміріне қауіп төндіретін жағдайдың қашан алдын аласыздар? Қалада иттер қаптап жүр, бала түгілі ересек адамның өзі қорқады, – деді аймақ басшысы.
Облыстық ветеринария басқармасының басшысы Равиль Сағандықов мәселені шешудің бір жолы иесіз иттерді бағатын үй-жай (приют) салу деп ұсыныс айтты. Бірақ облыс әкімі бұл ұсынысты құптамады.
Адамдарды баспанамен толық қамтып біте алмай жатқанда, иттерге үй салатын қаржы қайдан табамыз? Қалада ит бағатын бірнеше жекеменшік үй-жай бар деп отырсыз. Солармен келісіп, тиісті қаражат бөліп, жұмыс істеуге болады ғой. Ертең біреудің баласын ит талап, масқара болғанын күтіп жүрсіздер ме? Әрекет етіңіздер! – деп түйді Нұрымбет Сақтағанов.
Сонымен қатар аймақ басшысы бұралқы иттерді ұрықсыздандыру жұмысын ширатуды тапсырды.
Ветеринария басқармасының мәліметінше, бүгінгі таңда Өскеменде тоғыз жекеменшік ит бағатын үй жұмыс істеп тұр.
