Өскемендегі Maxi Mall сауда-ойын-сауық орталығында «Жастар таңдауы – жаңа Ата заң» атты үлкен live-концерт өтті. Қазақ эстрадасының жұлдыздары өнер көрсектен концертті тамашалауға өңірдің түкпір-түкпірінен 12 мыңнан астам адам жиналды. Кездесу ашық диалог форматында ұйымдастырылып, жаңа Конституция жобасы мен алдағы референдумды қолдауға арналды, деп хабарлайды F16.kz.
Кеш басталысымен-ақ залда көтеріңкі көңіл күй орнады. Жүргізушілер мен спикерлер ел болашағы әр азаматтың белсенділігіне байланысты екенін айтты. Қатысушылар сұрақ-жауап бөлімінде белсенділік танытып, өз ойларын ашық жеткізді
Жиында Конституцияны қолдау жөніндегі жалпыұлттық коалицияның өңірлік штабының өкілдері сөз сөйледі. Олардың қатарында Шығыс Қазақстан облыстық мәслихатының төрағасы Денис Рыпаков, С.Аманжолов атындағы ШҚУ ректоры Мұхтар Төлеген және жас белсенді Ануар Ахметқалиев болды.
Денис Рыпаков жаңа Конституция елдің тұрақты дамуына негіз болатынын айтып, тұрғындарды белсенді болуға шақырды.
Жаңа Конституция – мемлекеттің орнықты дамуының берік негізі. Оны қолдай отырып, біз тұрақтылықты, әділеттілікті және сенімді алға қадам басуды таңдаймыз. Өңір тұрғындары белсенді азаматтық ұстаным танытып, жарқын болашақ үшін дауыс береді деп сенемін, – деді.
Концерттік бағдарламада қазақстандық әншілер Еркін Нұржанов, SADRADDIN және Мирас Жүгінісов өнер көрсетті. Әсіресе жастар сүйікті орындаушыларын ыстық ықыласпен қарсы алды.
Ұйымдастырушылардың айтуынша, мұндай іс-шаралар халықпен ашық сөйлесуге және ортақ пікір алмасуға мүмкіндік береді.
