Шығыс Қазақстан облысында үш ірі инвестициялық аграрлық жоба жүзеге асырылып жатыр. Оның бірі — Алтай ауданын Солоновка ауылындағы сүт фермасы, деп хабарлайды F16.kz ҚР Ауыл шаруашылығы министрлігіне сілтеме жасап.
«Елжас» жауапкершілігі шектеулі серіктестігінің 600 бас ірі қараға арналған заманауи сүт-тауарлы фермасының құрылысы аяқталуға жақын. Жоба мемлекеттік қолдау аясында жүзеге асырылып жатыр.
Былтыр Солтүстік Қазақстан облысының тәжірибесін тарату бағдарламасы шеңберінде шаруашылыққа 1,2 миллиард теңге көлемінде жеңілдетілген несие берілді. Қазіргі уақытта симментал және голштин тұқымдарының 400 бас асыл тұқымды малы сатып алынды. Сонымен қатар шаруашылық 10 заманауи ауыл шаруашылығы техникасын иеленді. DeLaval компаниясының технологиялық жабдықтарымен қамтамасыз етілген, — делінген министрлік хабарламасында.
Фермадағы сауу залы толықтай автоматтандырылған басқару жүйесімен жабдықталған.
