«Әділетті және Прогрессивті Қазақстанның Халықтық Конституциясы үшін!» жалпыұлттық коалиция мүшелері Өскемендегі «Казцинк» кәсіпорнының еңбек ұжымымен кездесті. Жиынға Премьер-министрдің орынбасары – мәдениет және ақпарат министрі Аида Балаева, Мәжіліс депутаттары, сондай-ақ Қазақстан кәсіподақтар федерациясының төрағасы Сатыбалды Дәулеталин қатысты.
Кездесуде Аида Балаева металлургия саласы ел экономикасының тірегі екенін атап өтті. Оның айтуынша, жаңа Конституция жобасында еңбек ету құқығы, қауіпсіз жұмыс жағдайы және әділ еңбекақы мәселелері нақты көрсетілген. Бұл – жұмысшылардың құқықтары мен әлеуметтік қорғалуын күшейтуге бағытталған маңызды қадам.
Көп жылдан бері «Қазцинк» компаниясы Қазақстанның түсті металдар экспорттық нарығында ең жоғары бәсекелестікке төтеп беріп, қарқынды дамып жатқан ұжым. кәсібиліктің нәтижесі. Алайда, өнеркәсіптің әрі қарай дамуы, білікті мамандардың жұмыс істеуі және шетелдік инвестицияларды тарту үшін ішкі саяси тұрақтылық бізге бұрыннан да маңызды болып отыр. Өздеріңіз білесіздер, 15 наурызда жаңа Конституция бойынша референдум өтеді. Бұл – жай ресми рәсім емес. Әр азаматтың мемлекеттік маңызы бар мәселелерге атсалысып, өз ұстанымын тікелей білдіру мүмкіндігі. Соңғы жарты жылда Ата заңның жаңа мәтіні әзірленді. Ел тарихында алғаш рет Егемендік, Тәуелсіздік, ел аумағының тұтастығы мен басқару нысаны өзгермейтіні нақты бекітілді, – деді вице-премьер.
Мәжіліс депутаты Сергей Пономарев жаңа құжатта интернеттегі жеке деректерді қорғау, хат алмасу құпиясын сақтау және зияткерлік меншік құқықтарын қорғау нормалары күшейтілгенін айтты. Оның пікірінше, бұл азаматтардың онлайн кеңістіктегі қауіпсіздігін арттырады.
Кәсіпорын басшылығы да референдумның маңызын атап өтті. «Казцинкте» 19 мыңға жуық адам еңбек етеді. Компания өкілдерінің айтуынша, алдағы референдум елдің ұзақ мерзімді дамуына әсер ететін маңызды шешім болмақ.
Кездесу барысында жұмысшылар да өз пікірлерін білдіріп, 15 наурызда дауыс беруге қатысатындарын жеткізді. Олардың айтуынша, басты мақсат – тұрақты, дамыған және еңбегі бағаланатын Қазақстанды қолдау.
