Шығыс Қазақстан облысында туберкулезбен ауыратындар жылдан—жылға азайып келеді. Өңірде эпидемиологиялық жағдай тұрақты. Бұл туралы өңірлік коммуникациялар қызметі алаңында өткен брифингте облыстық фтизиопульмонология орталығы стационарлық қызметінің басшысы, дәрігер-хирург Болатбек Елшибеков мәлім етті, деп хабарлайды F16.kz.
Оның айтуынша, кейінгі он жылда өңірде туберкулезбен сырқаттану 23 пайызға төмендеп, бір жылда 415 жағдайға дейін азайған. Өлім-жітім 2 есе, аурудың таралуы 2,5 есеге азайған. Балалардың сырқаттануы 26 пайызға төмендеген. Былтыр облыста балалар арасында туберкулезден өлім-жітім болмаған.
Мамандар бұл оң көрсеткіштерді ең алдымен ерте анықтау жұмысының күшеюімен байланыстырады. Қазір диагноз қою үшін заманауи GeneXpert аппараты қолданылады. ПТР әдісі арқылы жүргізілетін зерттеу нәтижесі небары екі сағатта дайын болады. Бұл науқасқа дер кезінде ем бастауға мүмкіндік береді.
Дәріге төзімді туберкулез түрлерін емдеу Дүниежүзілік денсаулық сақтау ұйымы ұсынымдарына сәйкес жүргізіледі. Өңірде 12 айға дейін созылатын инъекциясыз, қысқа мерзімді емдеу сызбалары таблетка түрінде қолданылады, — деді Болат Елшибеков.
Сондай-ақ дәріге төзімді туберкулезді емдеу ұзақтығы бұрынғы 24 айдан 6-9 айға дейін қысқарды. Бұл науқастардың емді толық аяқтауына ықпал етіп, терапия нәтижесін жақсартуға мүмкіндік береді.
Мамандардың айтуынша, жүргізіліп жатқан кешенді шаралар өңірдегі эпидемиологиялық жағдайды тұрақты бақылауда ұстауға септігін тигізбек.
