Өскемендегі қару-жарақ дүкендерінің бейнебақылау камералары полицияның Жедел басқару орталығына қосылады. Бұл туралы ШҚО ПД баспасөз қызметі мәлім етті, деп хабарлайды F16.kz.
Құқық қорғау органдары мен бизнестің бірлескен жұмысы қалай жүзеге асырылатынын ШҚО полиция департаментінің бастығы, полиция генерал-майоры Ерлан Омарбеков айтып берді.
Бұл жерде әңгіме тек қауіпсіздік шаралары туралы болып отыр. Камераларды Жедел басқару орталығына қосу кез келген қатерге дереу әрекет етуге және тәуекелдердің алдын алуға мүмкіндік береді. Бұл ретте ішкі қызметке және коммерциялық процестерге ешкім араласпайды. Біздің ортақ міндет — азаматтардың, нысан қызметкерлерінің қауіпсіздігін қамтамасыз ету және өңірдегі тұрақтылықты сақтау, – деді ол.
Бейнебақылау жүйелерін қосу жекеменшік нысан иелерімен және басшыларымен өзара іс-қимыл жасай отырып, жоспарлы түрде жүргізіледі.
Қару-жарақ дүкендері мен қаруды орталықтандырылған сақтау пункттері террористік қауіпке осал нысандар тізбесіне енгізілгенін айта кету керек. Бейнебақылау жүйесін орталыққа қосу іргелес аумақ пен нысан ішіндегі жағдайды нақты уақыт режимінде бақылауға, ал штаттан тыс жағдай туындағанда полиция жасақтарының іс-қимылын жедел үйлестіруге мүмкіндік береді.
Қазір Өскеменде азаматтық және қызметтік қару сататын үш мамандандырылған дүкен және үш орталықтандырылған сақтау пункті жұмыс істейді.
