Шығыс Қазақстан облысының Глубокое ауданына қарасты Қарагужиха ауылына шұғыл жеткен құтқарушылар медициналық көмекке мұқтаж тұрғынға көмек көрсетті, деп хабарлайды F16.kz порталы ШҚО ТЖД баспасөз қызметіне сілтеме жасап.
1956 жылы туған әйелдің жағдайы нашарлап, оны шұғыл түрде медициналық мекемеге жеткізу қажет болған. Алайда ауылға апаратын жолдың нашарлығы бұл жұмысты біршама қиындатты. Қар қалың, жол жоқ. Дәрігерлер науқасқа өз көлігімен жете алмаған. Осыдан кейін көмекке құтқарушылар шақырылды. Мамандар жол талғамайтын арнайы техникамен қалың қарды бұза отырып, қиын жолмен жүріп ауылға жетті. Дәрігерлер науқасқа алғашқы қажетті көмек көрсеткеннен кейін сырқат әйел арнайы техникамен Өскемендегі медицина мекемесіне жеткізілді.
Мамандардың жедел әрі үйлесімді әрекетінің арқасында науқас дер кезінде дәрігерлердің қарауына берілді. Құтқарушылар мұндай жағдайларда тұрғындарға көмек көрсетуге әрдайым дайын екенін атап өту керек.
