Биыл Қазақстанда жылу электр орталықтары мен электр станцияларында энергетикалық жабдықтарды жаңғыртуға бағытталған ауқымды күрделі жөндеу жоспарланған. Бағдарлама аясында ел аумағында тоғыз энергоблок, 55 қазандық агрегаты және 51 турбина жаңартылады, деп хабарлайды F16.kz.
Қазір жөндеу жұмысы басталып кетті. Бүгінде екі энергоблок, төрт қазандық және екі турбина қайта қалпына келтіріліп жатыр.
Бағдарлама аясында Шығыс Қазақстан облысындағы энергетикалық нысандарға да ерекше назар аударылған. Өңірдегі бірнеше станцияда күрделі жөндеу жүргізу көзделген. Атап айтқанда, Өскемен жылу электр орталығында төрт қазандық агрегаты мен екі турбина жаңартылады. Согра жылу электр орталығында үш қазандық пен бір турбинаға күрделі жөндеу жүргізіледі. Сондай-ақ Риддер жылу электр орталығында бір қазандық агрегаты мен бір турбоагрегат жаңғыртылады.
Мамандардың айтуынша, бұл жұмыстар энергетикалық жүйенің сенімділігін арттыруға, апаттық жағдайлардың алдын алуға және тұрғындарды тұрақты жылумен және электр энергиясымен қамтамасыз етуге бағытталған.
Сарапшылардың пікірінше, жоспарланған жөндеу жұмысы энергетикалық инфрақұрылымның тұрақтылығын арттырып, станцияларды алдағы жылыту маусымына сапалы дайындауға мүмкіндік береді.
