Қазақстанда экологиялық волонтерлік қозғалысқа қатысушылар саны артып келеді. 2024 жылы олардың саны 40 мыңнан асса, былтыр 60 мыңның үстіне шыққан. Бұл туралы Мәдениет және ақпарат министрлігі мәлім етті, деп хабарлайды F16.kz порталы ortcom.kz-ке сілтеме жасап.
Былтыр министрліктің қолдауымен «Әр қадамда экосаналық» атты грант жобасы іске қосылды. Жоба «Таза Қазақстан» республикалық акциясы аясында Green Steppe ұйымының бастамасымен жүзеге асырылып жатыр. Жоба шеңберінде сарапшылардың қатысуымен вебинарлар ұйымдастырылып, оған еліміздің барлық өңірінен 300-ден астам адам қатысты. Сонымен қатар 1000-ға жуық экоактивист арнайы әзірленген білім беру курсынан өтті.
Жыл басынан бері жоба аясында өткен іс-шараларға 2000-нан астам волонтер қатысқан. Биыл экологиялық волонтерліктің даму деңгейін талдауға арналған «Қазақстандағы эковолонтерлік – 2026» атты зерттеу жүргізу жоспарланып отыр.
Экологиялық волонтерлікті дамыту бағытында бірқатар ауқымды акция да ұйымдастырылды. Мәселен, «10 жасыл күн» эко-челленджіне 2 мыңнан астам адам қатысып, 10 экологиялық тапсырма орындады. Ал «Жас ағаш» акциясы барысында 10 мыңнан астам волонтер мен бизнес өкілдері бес ұлттық парк пен қорық аумағында 300 мыңнан астам көшет екті.
Сондай-ақ «Эко бақылау» жобасы аясында 50-ден астам рейд өткізілді. Халықаралық World Cleanup Day акциясы кезінде 4 мыңнан астам қатысушы 22 түрлі локацияда тазалық жұмысын жүргізді.
Бұдан бөлек «Таза Каспий – Clean Caspian» экологиялық бастамасына Қазақстан мен Әзербайжаннан 2 мыңнан астам волонтер қатысып, үш жағалау аумағында тазалық жұмысын жүргізді. Нәтижесінде 3 тоннадан астам қоқыс жиналды.
Мамандардың айтуынша, бұл көрсеткіштер қоғамда экологиялық жауапкершілікке деген қызығушылықтың артып келе жатқанын және БҰҰ-ның Тұрақты даму мақсаттарына қол жеткізуге деген ұмтылысты көрсетеді.
