Шығыс Қазақстан облысында жыл басынан бері бірнеше өрт оқиғасы болған. Оның басым бөлігі тұрғын үй секторында тіркелген. Сондай-ақ отқа оранған көліктер де бар. Бұл туралы облыс әкімі Нұрымбет Сақтағановтың төрағалығымен өткен жиында айтылды, деп хабарлайды F16.kz.
Мамандардың айтуынша, өрттің негізгі себептері – электр жабдықтарын және пештің жылыту жүйесін қолдану кезінде қауіпсіздік талаптарының сақталмауы.
ШҚО төтенше жағдайлар департаментінің мәліметінше, тілсіз жаудан 11 адам қаза тапқан, оның үшеуі – бала. Бұл қайғылы оқиғалар балалар ересек адамның қарауынсыз қалған кезде болған.
Мамандар еліміздің өзге өңірлерінде болған оқыс оқиғаларды да талқылады. Атап айтқанда, Щучинск қаласындағы қайғылы жағдай мен Семейдегі ойын-сауық орталығында шыққан өрттің себеп-салдары туралы айтылды. Тілсіз жаудың алдын алу, сақтық шараларын күшейту мәселесіне назар аударылды. Адам көп жиналатын орындарда өрт қауіпсіздігін күшейту қажеттігі ескертілді.
Аймақ басшысы Нұрымбет Сақтағанов өрт қаупінің алдын алу шараларын күшейтуді тапсырды. Жауапты басқармалар тұрмыстық газ баллондарын және газ жабдықтарын пайдалану тәртібін қатаң бақылау, мектептерде қауіпсіздік сабақтар мен эвакуациялық жаттығулар ұйымдастыру күн тәртібіне қойылды.
Сонымен қатар кәсіпкерлерге өрт қауіпсіздігі талаптарын қатаң сақтау жөнінде түсіндіру жұмыстары жүргізіледі. Бұл әсіресе Ораза айт пен Наурыз мейрамы сияқты халықтық мерекелер кезінде өте маңызды.
