А.Пушкин атындағы Шығыс Қазақстан облыстық кітапханасы «ЖИ-комплектатор» атты жаңа цифрлық жобаны іске қосты, деп хабарлайды F16.kz.
2026 жылды Президент Қасым-Жомарт Тоқаев Цифрландыру және жасанды интеллект жылы деп жариялады. Өңірде бұл бағытта ел экономикасы мен қоғам дамуына ықпал ететін ілкімді істер жүзеге асырылып жатыр. Соның бірі — Пушкин кітапханасында қолға алынған осы жоба.
Бұл – кәсіби кітапхана саласында жасанды интеллект технологияларын қолдану арқылы күнделікті қайталанатын процестерді автоматтандыруға арналған инновациялық шешім.
Жасанды интеллект негізінде жұмыс істейтін «ЖИ-комплектор» интеллектуалды қосымшасы кітапхана қорына түскен жаңа кітаптарды өңдеу үдерісін айтарлықтай жеделдетуге мүмкіндік береді. Қосымша қолданыстағы ИРБИС кітапханалық-ақпараттық жүйесіне кіріктірілген. Соның арқасында жаңа әдебиеттер туралы ақпарат электронды каталогта жылдам пайда болып, оқырмандарға бұрынғыға қарағанда бірнеше есе тез қолжетімді болады, — деді Пушкин атындағы облыстық кітапхана директоры Назым Тлеубекова.
Жобаның тағы бір маңызды қыры – кітапхана саласындағы мамандандырылған кадр тапшылығы мәселесін шешуге ықпал етуі. Технологиялық шешім қайталанатын жұмыстарды автоматтандырып, мамандардың уақытын тиімді пайдалануға мүмкіндік береді.
Бүгінде Пушкин атындағы кітапхана өз саласында жасанды интеллектке негізделген жаңа технологиялық шешімдерді ұсынған Қазақстандағы әзірге жалғыз көпшілік кітапхана болып отыр. Былтыр мекеме DosAI нейро-ассистенті жүйесін енгізсе, биыл «ЖИ-комплектор» атты жаңа цифрлық шешімді ұсынды.
Мамандардың айтуынша, бұл жобалар Қазақстанның кітапхана саласында жасанды интеллектті қолданудың алғашқы серпінді тәжірибелерінің бірі саналады және алдағы уақытта оны одан әрі дамыту мүмкіндігі бар.
