Германияның халықаралық ынтымақтастық қоғамы (GIZ) Қазақстанның Су ресурстары және ирригация министрлігіне 240 жаңа техника береді. Оның ішінде 110 жүйелік блок, 50 планшет, 60 ноутбук және 20 монитор бар.
Жаңа техника елдегі бассейндік су инспекцияларының жұмысына арналған. Қазіргі уақытта министрлік 130 техниканы қабылдап үлгерді. Қалған 110 құрылғы жыл соңына дейін жеткізіледі.
Техникалық жабдықтау 2023 жылдың қазан айында Су ресурстары және ирригация министрлігі мен GIZ арасында жасалған келісім аясында жүзеге асырылып жатыр.
Су ресурстары және ирригация министрінің бірінші орынбасары Нұрлан Алдамжаровның айтуынша, жаңа техника су қорын қорғаумен айналысатын бассейндік инспекциялардың жұмыс тиімділігін арттыруға мүмкіндік береді.
Ол сондай-ақ министрлік құрылғаннан бері инспекция бөлімдері әр облыс орталығында ашылғанын және қызметкерлер саны екі есеге артқанын атап өтті. Сонымен қатар былтыр қабылданған Қазақстан Республикасының Су кодексі инспекторлардың бақылау және қадағалау өкілеттіктерін кеңейтті.
