Шығыс Қазақстан облысында қысқы спорт түрлерін дамыту жұмыстары жүйелі түрде жалғасып жатыр. Осы бағытта Риддер қаласында екі ірі спорттық жобаны іске асыру жоспарланып отыр, деп хабарлайды F16.kz порталы облыс әкімінің баспасөз қызметіне сілтеме жасап.
Алғашқы жоба — К-20 трамплинін салу. Қазір нысан орналасатын жер телімі анықталды. Ол Риддер қаласының саябақ аймағында орналасқан. Жер учаскесіне 05-083-011-753 кадастрлық нөмірі берілген, жалпы аумағы 2,0544 гектарды құрайды. Қазір жобалық-сметалық құжаттаманы әзірлеу үшін қажетті құжаттарды дайындау жұмыстары жүргізіліп жатыр.
Екінші жоба — ұзындығы 5 шақырым болатын заманауи шаңғыроллер трассасын салу. Жобаға сәйкес, нысан жасанды қар өндіру жүйесімен, жарықтандырумен, видеотөрешілік жүйесімен және 30 қондырғыға арналған биатлондық ату алаңымен жабдықталады. Қазіргі уақытта бұл жоба бойынша жобалық-сметалық құжаттама әзірленіп, мемлекеттік сараптамадан өтіп жатыр.
Спорттық инфрақұрылымды дамыту Риддер қаласы үшін аса маңызды. Бұл өңір қысқы спорттағы жетістіктерімен кеңінен танымал.
Жуырда риддерлік спортшы Сергей Ткаченко трамплиннен шаңғымен секіруден Қазақстан чемпионы атанды. Бұл жергілікті спортшылардың жоғары дайындық деңгейін тағы бір мәрте дәлелдеді. Ал жаңа спорт нысандары болашақта тағы да жаңа чемпиондарды тәрбиелеуге мүмкіндік береді.
Сонымен қатар Самар ауданына қарасты Құлынжон ауылында заманауи талаптарға сай жабдықталған жаңа спорт нысаны пайдалануға берілді. Нысан жеке кәсіпкердің бастамасымен салынып, барлық қажетті құрал-жабдықтармен қамтамасыз етілген.
Спорт кешеніне ересектер де, балалар да бара алады. Екі қабатты спорт залында түрлі спорт түрлерімен шұғылдануға жағдай жасалған. Мұнда алдағы уақытта спорттық іс-шаралар мен жарыстар ұйымдастыру жоспарланып отыр.
Сондай-ақ ерлер мен әйелдер арнайы белгіленген күндері келіп, тегін жаттыға алады. Нысанда киім ауыстыратын және жуынатын бөлмелер қарастырылған. Жаңа спорт кешені ауылдағы спорттық инфрақұрылымды дамытуға бағытталған маңызды қадамдардың бірі болды.
