Бүгін Өскеменнің ең қарт тұрғыны, 103 жастағы Анастасия Светочева өз таңдауын жасады, деп хабарлайды F16.kz.
№94 референдум учаскесінің комиссия мүшелері Әйгерім Саньязова мен Гүлім Тайырқызы дауыс беру жәшігін қарияның үйіне әкелді.
Соғыс ардагері Анастасия Павловна біздің учаскедегі жасы ең үлкен тұрғын. Ол кісінің жүріп-тұруы қиын болғандықтан біз бюллетень жәшігін үйге алып келдік. Жалпы, №94 учаскеде үйде дауыс беретін 70 адам бар, біз бүгін кешке дейін олардың бәріне барып шығамыз, – деді Әйгерім Саньязова.
Ғасыр жасаған Анастасия әжей бүгінге дейін елімізде өткен барлық саяси науқанға қатысып, өзінің азаматтық парызын мінсіз орындап келе жатқанын мақтанышпен айтты.
Елдегі өткен барлық сайлауға, референдумға қатыстым. Кезінде сайлау комиссиясының мүшесі, депутаттың сенімді өкілі болдым. Сондықтан мұндай саяси іс-шарада әр азаматтың дауысы маңызды екенін жақсы білемін. Әрбір адам өзінің болашағы үшін, ұрпағының жақсы өмірі үшін дауыс беруі керек, – деді Анастасия Светочева.
