Мемлекет басшысы Қасым-Жомарт Тоқаев ел тарихында тұңғыш рет әкімшілік істер бойынша рақымшылық жасауды ұсынды. Бұл туралы ол Конституцияны қабылдауға арналған салтанатты жиында айтты, деп хабарлайды F16.kz порталы Ақордаға сілтеме жасап.
Рақымшылық азаматтар мен мемлекеттің қауіпсіздігіне қауіп төндірмейтін бірқатар қылмыстық және әкімшілік құқықбұзушылық бойынша жүргізіледі.
Елімізде әкімшілік істер бойынша рақымшылық алғаш рет жасалатынын атап өткім келеді. Парламент қазіргі сессияның соңына дейін тиісті заң қабылдауы керек. Бұл – Негізгі заңдағы адамгершілік идеалдары мен прогрессивті құндылықтарды қоғамда орнықтыратын маңызды қадам. Жаңа Конституция – халқымыздың ынтымақ-бірлігінің жарқын символы. Оның баптарында әрбір қазақстандықтың арманы мен аңсары, ұрпағының баянды болашағына деген үміті мен сенімі көрініс тапқан. Ата заң барша азаматтың – Отанымыздың шынайы патриоттарының басты бағдарына айналады. Қазақстанның жаңа Конституциясы – әлемдік өркениеттің биігіне бет алған ұлтымыздың берік әрі мызғымыз тұғыры. Менің бұған ешқандай күмәнім жоқ. Сіздердің де шүбәларыңыз болмайды деп ойлаймын, — деді Президент.
