Шығыс Қазақстан облысында «Бизнес және салық» атты ақпараттық жоба жүзеге асырылып жатыр. Кәсіпкерлер палатасы мен мемлекеттік кірістер департаменті бірлесіп қолға алған жоба аясында көлік салығына қатысты өзгерістер түсіндірілді, деп хабарлайды F16.kz.
Мамандар 2025 жылдың көлік салығын қалай төлеу керектігін және жаңа ережелердің болашақта есепке қалай әсер ететінін қарапайым тілмен айтып берді. Негізгі өзгерістің бірі – көліктің жасына қарай салықтың азаюы. Егер автокөлік 10-20 жыл аралығында болса, салық 30%-ға төмендейді, ал 20 жылдан асқан көліктерге 50% жеңілдік беріледі. Бірақ бұл өзгерістер 2026 жылға есептеліп, 2027 жылы төленетін салыққа қатысты болады.
Сонымен қатар фермерлерге қосымша жеңілдіктер қарастырылған. Енді шаруа қожалықтары жүк тасымалдауға арналған бір пикап көлігіне салық төлемейді.
Мамандар жеңілдіктер болғанымен, салықты уақтылы төлеу маңызды екенін ескертті. Уақытынан кешіктірсе, өсімпұл қосылып, шектеулер болуы мүмкін.
Тікелей эфир барысында кәсіпкерлер мен тұрғындар сұрақ қойып, салықты есептеу, жеңілдіктерді пайдалану және онлайн қызметтер туралы жауап алды.
Жоба ұйымдастырушыларының айтуынша, басты мақсат – кәсіпкерлерге салық жүйесін түсіндіру және салықты дұрыс әрі уақытында төлеу мәдениетін қалыптастыру.
