2024–2029 жылдары Шығыс Қазақстан облысында 450 мыңнан астам көшет егу көзделген. Оның 248,5 мыңы өткен екі жылда егілсе, биыл тағы 111,2 мың тал отырғызу жоспарда бар. Бұл туралы аймақ басшысының қатысуымен өткен «Таза Қазақстан» жалпыұлттық жобасының жүзеге асырылу барысы талқыланған кеңейтілген жиылда мәлім болды, деп хабарлайды F16.kz.
Жиында облыстық энергетика және тұрғын үй-коммуналдық шаруашылық басқармасының басшысы Наурызбай Сармурзин атқарылып жатқан жұмыстар мен алдағы жоспарларды таныстырды. Оның айтуынша, биыл өңірде экологиялық мәдениетті қалыптастыру, елді мекендердің санитарлық жағдайын жақсарту, сондай-ақ абаттандыру мен көгалдандыру бағытында кешенді іс-шаралар жүзеге асырылады.
Былтыр ауқымды жұмыстар атқарылды. «Таза Қазақстан» бағдарламасы аясында ұйымдастырылған шараларға 150 мыңға жуық тұрғын қатысқан, 259 арнайы техника жұмылдырылып, 3 800 тонна қоқыс шығарылған. Нәтижесінде 3 400-ден астам аула тазартылып, оның ішінде 801 көпқабатты тұрғын үй мен 2 602 жеке үйдің аумағы ретке келтірілген.
Сонымен қатар өңірде «Үлгілі ауыл» және «Таза аула – таза қала, аудан» байқауларын өткізу жоспарланып отыр. Бұл бастамалар тұрғындардың тазалыққа деген жауапкершілігін арттыруға бағытталған.
Облыс әкімі Нұрымбет Сақтағанов «Таза Қазақстан» жобасының маңызына тоқталды. Оның айтуынша, тазалық – тек мемлекеттік органдардың емес, әрбір азаматтың ортақ міндеті.
Наурыз мейрамында ата-бабаларымыз ауласын тазалап, қоршаған ортаны күтіп ұстауға ерекше мән берген. Біз де осы дәстүрді жалғастырып, тұрғындар арасында түсіндіру жұмыстарын күшейтуіміз қажет. Өңірімізді таза әрі көрікті ету үшін барлық мекеме қызметкерлері мен тұрғындар бірлесе жұмыс істеуге тиіс, – деді аймақ басшысы.
Сонымен қатар биыл облыста «Мектеп жасына дейінгі балаларды экологиялық тәрбиелеу және оқыту» бағдарламасы бойынша педагогтердің біліктілігін арттыру, «Жасыл мектеп» жобасын енгізу, экологиялық роликтер мен фильмдер шығару жоспарланған.
