Өңірде көктемгі су тасқыны кезеңіне дайындық жұмыстары жалғасып жатыр. Шығыс Қазақстан облысында су тасқыны қаупі бар учаскелерге әуеден барлау жүргізілді, деп хабарлайды F16.kz.
Шығыс Қазақстан облысының Үлкен Нарын, Марқакөл, Зайсан және Тарбағатай аудандарының аумақтарына әуеден шолу жүргізілді.
Зерттеу нәтижелері бойынша өңір аумағының шамамен 85%-ын қар жамылғысы алып жатыр. Төменгі және оңтүстік аудандарда қар жамылғысы іс жүзінде жоқ, қардың негізгі қоры таулы аймақтарда шоғырланған, — дейді ШҚО ТЖД баспасөз қызметі.
Әуеден шолу барысында Марқакөл ауданындағы Орта-Теректі су қоймасының бөгеті мен Қандысу су қоймасы тексерілді. Орта-Теректі су қоймасында қазір төтенше жағдай туындау қаупі жоқ.
Ал Қандысу су қоймасы қазіргі уақытта транзиттік режимде жұмыс істейді, су жинақтау жүргізілмейді.
Жалпы тексерілген аудандар бойынша су тасқыны жағдайы тұрақты, гидробекеттердегі су деңгейі қауіпті межеден төмен. Өзен арналарынан су тасып шығу фактілері тіркелген жоқ, — деді ШҚО ТЖД бастығының орынбасары Амангелді Енсегенов.
