Белгілі қазақстандық фристайлшы, әлем чемпионы, Олимпиаданың қола жүлдегері Юлия Галышева спорттағы мәнсабын аяқтауға шешім қабылдады, деп хабарлайды F16.kz.
ШҚО денешынықтыру және спорт басқармасы баспасөз қызметінің мәліметінше, бұл туралы спортшы ертең, 31 наурызда өтетін БАҚ өкілдеріне арналған баспасөз мәслихатында жария етпек.
Шығыстың тумасы Юлия Галышева 20 жылдан астам уақыт бойы фристайл-могулдан Қазақстан құрамасының сапында абыройлы өнер көрсетіп, елдегі даңқты спортшылардың біріне айналды. Кәсіби мәнсабында ол төрт бірдей қысқы Олимпиада ойындарына қатысқан (2010, 2014, 2018, 2022 жылдары). Галышева – елдегі қысқы спорттың дамуына өлшеусіз үлес қосқан тұлға.
Баспасөз мәслихатында спортшы бастан кешкен қызығы мен шыжығы мол мәнсабы, жеңістері мен жеңілістері туралы сыр тарқатып, болашақ жоспары жайлы баян етпек.
