Көктем шыға Өскемен тұрғындары жол сапасына жиі шағымдана бастады. Әлеуметтік желілерде ойлы-шұңқырлы жолдардың фото-видеолары таралып, жұртшылықтың наразылығын туғызып жатыр. Ал коммуналдық қызметтер қардан кейін пайда болған шұрық тесіктерді кесек таспен бітеп, уақытша амалдағанмен бұл мәселені толық шеше алмай отыр, деп хабарлайды F16.kz.
Өскемен қаласының әкімі Алмат Ақышов қоғамда қызу талқыланып жатқан жолдардың жағдайына жіті назар аударды. Шаһар басшысының сөзінше, бұған дейін бюджет шығындарын оңтайландыру туралы тапсырма берілген. Соның нәтижесінде тиімсіз шығындар қысқартылып, қаражат жол инфрақұрылымын дамытуға бағытталды.
Былтыр атқарылған жұмыстарды мұқият тексеріп, барлық мердігер ұйымдардың жауапкершілігін күшейту қажет. Жолдардың жағдайы баршаға белгілі, сондықтан сапаға ерекше назар аударылуға тиіс. Біздің негізгі мақсат — қаладағы барлық жолды толықтай ретке келтіру, — деді әкім.
Айта кетейік, биылдан бастап жол жөндеу жұмыстары бес жылдық кепілдікпен жүргізіледі. Осы мерзім ішінде анықталған кез келген кемшілікті мердігер өз қаражаты есебінен түзетуге міндетті.
