Шығыс Қазақстан облысының Зайсан ауданы, Қаратал ауылында 18 отбасы «Бірқабатты Шығыс» бағдарламасы аясында жаңа үйлердің кілтін алып, қоныстойын тойлады, деп хабарлайды F16.kz.
Жаңару мен жаңа бастамалардың символы саналатын Наурыз мерекесінде тұрғындар тек баспанаға қол жеткізіп қойғап жоқ, ертеңгі күнге деген сенім мен жаңа өмір бастауға мүмкіндік алды.
Жаңа қоныс иелері – көпбалалы отбасылар мен әлеуметтік жағдайы төмен тұрғындар. Қолданысқа берілген барлық үйлер тұруға толық дайын: газ, ауызсу тартылған, кәріз жүйесі жұмыс істейді.
Қаратал ауылдық округінің әкімі Мереке Сайрановтың айтуынша, бағдарлама аясында баспаналы болып жатқан 18 отбасының сегізі көпбалалы болса, 10-ы әлеуметтік тұрғыдан осал санатқа жатады.
Қоныстой иелерінің бірі – көпбалалы ана Құралай Әлібаева. Оған кең, төрт бөлмелі үйдің кілті табысталды.
Ұлыстың ұлы күні Наурыз мерекесінде көптен күткен баспанамызға қол жеткіздік. Бұл – отбасымыз үшін үлкен бақыт. Қолдау көрсеткен жандарға алғыс айтамыз. Осындай үйлер мұқтаж отбасыларға көбірек берілсе екен, – деді ол.
Ауыл тұрғындарының айтуынша, Қараталда Наурыз жыл сайын жоғары деңгейде өтеді: киіз үй тігіліп, адамдар ұлттық киім киіп, қариялар бата беріп, әжелер шашу шашып, ұлттық спорт ойындары ойнатылып, қазақтың бағзыдан келе жатқан салт-дәстүрі жаңғырады.
Қос қуанышқа кенелген ауыл халқы өңірдің дамуындағы оң өзгерістерді атап өтіп, Президент мен облыс басшылығына ауылдағы өмір сапасын арттыруға көрсеткен қолдауы үшін алғыс білдірді.
Кілт табыстау рәсімінен кейін қонақтар жаңа үйлерді аралап, қоныстойын жалғастырды.
Естеріңізге сала кетейік, Шығыс Қазақстанда Мемлекет басшысы Қасым-Жомарт Тоқаевтың халықты қолжетімді әрі жайлы баспанамен қамтамасыз ету жөніндегі тапсырмасы жүйелі жүзеге асырылып келеді.
