Бірнеше күнге созылған қолайсыз ауа райына байланысты Өскемен әуежайында бірқатар бағыттағы әуе рейстерінің уақыты өзгерді. Биылғы 30 наурыз сағат 17.20-дан бастап 31 наурызға дейін шамамен 11,5 сағат бойы қаланы қалың тұман тұмшалап, қарға адым жер көрінбей қалды, деп хабарлайды F16.kz.
Осы жағдайға байланысты екі рейс қона алмады. Атап айтқанда, Астана–Өскемен бағыты бойынша FlyArystan әуе компаниясының FS7371 рейсі және Алматы–Өскемен бағыты бойынша SCAT әуе компаниясының DV725 рейсі кейінге шегерілді. Екі рейс те 31 наурызға ауыстырылды.
Бүгін, 31 наурызда да жағдай айтарлықтай өзгермеген. Өскемен және Семей әуежайларында қалың тұман сейілмеді, көріну деңгейі төмен күйінде қалып отыр. Соның салдарынан рейстер кешіктіріліп, ұшу кестесіне өзгерістер енгізілген.
Мамандардың айтуынша, рейстерді орындау, кейінге қалдыру немесе мүлде тоқтату туралы шешімді әуе компаниялары тек ұшу қауіпсіздігін ескере отырып қабылдайды.
Айта кетейік, ауа райы туралы мәліметті «Қазаэронавигация» кәсіпорнының метеорологиялық қызметі ұсынады. Авиакомпаниялар өз шешімдерін осы ресми деректер негізінде қабылдайды.
