Үкімет отырысының қорытындысы бойынша Премьер-министр Олжас Бектенов инновациялық дамуды күшейтуге бағытталған бірқатар нақты тапсырма берді. Жаңа Конституцияда бекітілген нормалар аясында бұл салаға ерекше назар аударылмақ, деп хабарлайды F16.kz.
Ең алдымен, Ғылым және жоғары білім министрлігіне мүдделі мемлекеттік органдармен бірлесіп, үш күн ішінде Үкімет жанынан инновациялық штаб құру тапсырылды. Бұл құрылым ведомствоаралық үйлестіруді қамтамасыз етіп, технологиялық басымдықтарды айқындаумен айналысады. Штабқа Премьер-министрдің орынбасары – мәдениет және ақпарат министрі Аида Балаева төрағалық етеді. Оның негізгі міндеті – идеядан бастап дайын өнімге дейінгі барлық кезеңде инновациялық экожүйе қатысушыларының жұмысын үйлестіру.
Сонымен қатар Үкімет басшысы кәсіпорындардың инновациялық белсенділігін арттыру үшін нақты шаралар қабылдауды тапсырды.
Кәсіпорындардың инновациялық белсенділігін ынталандыру үшін осы жылдың 1 маусымына дейін барлық өндіріс орындарының инновациялық қызметі мен технологиялық даму жағдайына кешенді түрде түгендеу жүргізу керек, — деді Үкімет басшысы.
Бұдан бөлек осы мерзімге дейін нақты салалар мен технологияларға басымдық бере отырып, Инновацияларды дамыту тұжырымдамасын әзірлеу міндеті қойылды.
Цифрландыру бағыты да назардан тыс қалмады. Ғылым және Жасанды интеллект министрліктері салалық ведомстволар және әкімдіктермен бірге 1 шілдеге дейін инновациялық жобаларды тіркеу, қолдау және мониторинг жүргізуге арналған «бірыңғай терезе» қағидаты бойынша жұмыс істейтін цифрлық платформаны іске қосуы қажет. Сонымен қатар, әзірлеушілер, технологиялар және инвесторлар туралы мәліметтерді қамтитын ұлттық ашық тізілім құру жоспарланып отыр.
Жалпы, бұл шаралар елімізде инновациялық экожүйені жүйелі түрде дамытуға және бизнес пен ғылым арасындағы байланысты күшейтуге бағытталған.
