Шығыс Қазақстан облысында бірінші сыныпқа баратын оқушылардың құжатын қабылдау 10 маусымда басталып, 31 тамызға дейін жалғасады. Бұл туралы өңірлік коммуникациялар қызметінде өткен брифингте облыстық білім басқармасының басшысы Қуат Оқасов мәлімдеді, деп хабарлайды F16.kz.
Басқарма басшысының айтуынша, Оқу-ағарту министрлігі бірінші сыныпқа қабылдау тәртібіне өзгерістер енгізген. Бұған дейін құжат қабылдау 1 сәуірде басталып, бүкіл ел бойынша бір мезгілде жүргізілетін. Соның салдарынан электронды жүйеге түсетін жүктеме артып, ол жиі-жиі істен шығып қалатын. Енді қабылдау мерзімі өңірлер бойынша кезең-кезеңімен ұйымдастырылмақ. Бұл электронды жүйеге түсетін салмақты азайтып, ата-аналарға өтініш беру үдерісін жеңілдетеді.
Айта кетейік, Шығыс Қазақстан облысы құжат қабылдау кеш басталатын өңірлер қатарында. Ал еліміздің өзге аймақтарында бұл 27 мамырдан басталады.
Бірінші сыныпқа қабылдаудың негізгі тәртібі өзгеріссіз қалады. Егер бала белгілі бір мектептің нөлдік сыныбында білім алып, сол білім ордасында оқуын жалғастырғысы келсе, ата-аналардан қосымша өтініш талап етілмейді — оқушы автоматты түрде бірінші сыныпқа көшіріледі, — деді Қуат Оқасов.
Жаңа өзгерістер өтініш қабылдау науқанын оқу үдерісінен бөліп, мектеп әкімшіліктеріне түсетін жүктемені азайтуға және білім беру жүйесіндегі техникалық ақаулардың алдын алуға бағытталған.
