Шемонаиха қаласындағы ұн тарту-құрама жем зауытының өндірістік желілері жаңғыртылып, қоймасы кеңейтіліп, жабдықтар жаңартылады. Былтыр осы мақсатқа 1,5 млрд теңге көлемінде инвестиция тартылған, деп хабарлайды F16.kz.
Аталған кәсіпорын 1999 жылдан бері жұмыс істейді. Бүгінде көп жылғы тәжірибені заманауи технологиямен ұштастыра отырып, тұрақты дамып келеді. Мұнда терең өңдеуден өткен ұн, құрама жем және астық өнімдері өндіріледі.
Өнімдеріміз ішкі нарықта, яғни еліміздің оңтүстік өңірлеріне және Тәжікстан мен Өзбекстанға экспортталады. Бірыңғай кешенді бағдарлама аясында 1,9 млрд теңге көлемінде несие алып, Түркиядан жаңа қондырғылар әкелінді. Заманауи технология өндіріс тиімділігін арттырып, сапалы өнім шығаруға мүмкіндік береді, — деді комбинат директоры Тимур Тилов.
Шемонаиха ұн тарту-құрама жем зауыты — заманауи агроөнеркәсіп кешені. Оның құрамында өнімділігі сағатына 25 тоннаға дейін жететін құрама жем зауыты, тәулігіне 60 тоннаға дейін астық өңдейтін диірмен кешені, астық пен майлы дақылдарды тазалап, кептіріп, сақтайтын элеватор кешені және кептіру қондырғысы бар.
Қазір комбинатта 53 адам жұмыс істейді. Биыл қызметкерлерге арналған жатақхана салу да жоспарланған.
