Бүгін облыс орталығының тұрғындары Президент Қасым-Жомарт Тоқаевтың «Таза Қазақстан» бастамасына жаппай қолдау білдіріп, қала көшелерін қоқыстан тазартты, деп хабарлайды F16.kz.
Жалпықалалық сенбілікке қала тұрғындары, еріктілерлен бөлек, әр сала өкілдері, әкімдік қызметкерлері де белсене қатысты.
Туған жердің тазалығына бей-жай қарамаған мемлекеттік қызметкерлер таңғы сегізден бастап Протозанов көшесінің бойына жиналып, Спорт сарайы тұсындағы Үлбі көпірінен бастап Крылов көшесіндегі көпірге дейінгі қоқыстан тазартып шықты.
Елімізде өтіп жатқан тазалық акциясына біз де қолдау білдіріп жатырмыз. Бүгін Протозанов көшесінің белгіленген аумағын тұрмыстық қалдықтардан тазартып жатырмыз. Алдағы уақытта да белгіленген учаскені өз жауапкершілігімізге алып, тазарту жұмыстарына қатысамыз, – деді облыстық әкімдік қызметкері Алмас Амангелдіұлы.
Аталған акция 30 Гвардиялық дивизия, Астана, Протозанов көшелері және басқа да қала көшелерінде жалғасын тапты.
Айта кетейік мұндай сенбілік Өскеменде әр жылы көктемде ұйымдастырылып, екі айға, яғни мамырдың соңына дейін жалғасады.
