Өскеменде алғаш рет ерекше қажеттілігі бар балаларға арналған инклюзивті спартакиада өтті, деп хабарлайды F16.kz.
Шараның мақсаты – ерекше қажеттілігі бар балаларды тәрбиелеп отырған отбасыларға қолдау білдіріп, инклюзивті қоғам мәдениетін дамыту. Сондай-ақ салауатты өмір салтын насихаттау және балаларға қолдау көрсету.
Спартакиадаға ерекше қажеттіліктері бар балалар, олардың ата-аналары мен қаладағы түзету және оңалту ұйымдарының мамандарынан құралған барлығы 9 команда қатысқан.
Жарысқа қатысушылар командалық эстафета, қысқа қашықтыққа жүгіру, арқан тартыс, армрестлинг, ләңгі және басқа да спорт түрлері бойынша бақ сынасуда.
Мұндай бастамалар шектеусіз инклюзивті қоғам, достық қарым-қатынас құруға көмектеседі және біз оларды жүзеге асыруға қуана қатысамыз. Мұндай іс-шаралар біздің қаламызда жақсы дәстүрге айналады деп үміттенеміз, – деді «Казцинк» компаниясының әкімшілік жөніндегі басқарушы директоры Андрей Лазарев.
Жарыс қорытындысы бойынша I орынды «Асыл Мирас» autism-орталығының «Асыл Мирас» командасы иеленді, II орынға «Demey» орталығының «Неваляшки» командасы ие болды, III орынды ерекше білім беру қажеттілігі бар балаларға арналған «BASTAU» мектебінің «BASTAU» командасы жеңіп алды.
