Биылғы 18-19 маусымда Өскеменде агроөнеркәсіп саласындағы ірі халықаралық іс-шаралардың бірі — V мерейтойлық PRO МОЛОКО 2026 & QazaqSut форум-көрмесі өтеді. Ашық алаңда сала мамандары, инвесторлар, бизнес өкілдері және шетелдік сарапшылар бас қосып, аграрлық сектордың қазіргі жағдайы мен даму болашағын талқылайды.
Форумның іскерлік бағдарламасы аясында инвестициялық мүмкіндіктерді кеңейтуге бағытталған Agro Industry Invest 26.ALTAI атты III инвестициялық кездесу ұйымдастырылады. Сонымен қатар Шығыс Қазақстан облысындағы майлы дақылдар кластерінің тәжірибесіне арналған дөңгелек үстелде агросектордағы тиімді модельдер мен нақты кейстер ұсынылады. Ет өндірісінің өзекті мәселелері QAZAQ ET 2026 форумында қарастырылса, отандық өнімді ілгерілету мақсатында халықаралық әріптестердің қатысуымен бал өндірушілер мен экспорттаушылар конференциясы өтеді.
Іс-шара бағдарламасы практикалық бағыттағы бөлімдермен де толықтырылған. Қатысушылар «Восток-молоко» зауытына және заманауи тауарлы-сүт фермаларды аралап, технологиялық турға қатысады, өндірістегі озық тәжірибелермен танысады. Бұдан бөлек сүт, жемшөп және майлы дақылдар өндірісіне қатысты сараптамалық сессиялар мен таныстырылымдар өтеді. Сыр өндірушілер гильдиясының семинары мен гастрономиялық шоу ұйымдастырылады.
Ұйымдастырушылардың мәліметінше, форумға 15-тен астам елден қатысушылар келіп, 40-тан астам беделді спикер сөз сөйлейді. Жалпы, шараға 1500-ден астам делегат пен қонақты қатыспақ.
Мамандардың пікірінше, мұндай халықаралық деңгейдегі кездесу өңірдің агроөнеркәсіптік кешенін дамытуға тың серпін беріп, жаңа серіктестік байланыстар орнатуға мүмкіндік ашады.
