Күн жылынып, тұрғындар терезе аша бастағанда, балалы үйде қауіп арта түседі. Былтыр өңірде тоғыз бала терезеден құлап, біреуі көз жұмған. Құтқарушылар жазатайым жағдайдың алдын алу үшін ерекше тәсілді қолданып, тұрғындарға ескерту жасап жатыр, деп хабарлайды F16.kz.
Көпқабатты үйлердің ауласында ұшқан дрондар дауыс зорайтқыш арқылы тұрғындарға қауіпсіздік шараларын еске салады.
Терезеде орнатылған москит торына сену – өте қауіпті. Бала терезесі ашық тұрған бөлмеде қараусыз қалса жазатайым жағдай болуы бір-ақ сәт. Сондықтан балалардың қауіпсіздігіне ерекше көңіл бөлуге шақырамыз, — деді ШҚО ТЖД бастығының орынбасары Исхар Савазов.
Құтқарушылар ата-аналарға арнайы құлыптар мен бекіткіштер орнатуды, терезе алдында тұрған жиһазды алып тастау ұсынады және балаларды қараусыз қалдырмау керектігін ескертеді.
