15–16 мамыр күндері Шығыстың бас шаһарында «Ғасырлық дәстүрлер» кілем тоқу және сәндік-қолданбалы өнер бұйымдарының халықаралық фестивалі өтеді, деп хабарлайды F16.kz.
Ауқымды шарада еліміздің түкпір-түкпірінен және Өзбекстан, ҚХР, Ресей Федерациясы, Моңғолиядан келген шеберлер мен қолөнершілер, этнодизайнерлер, музейлер мен креативті индустрияны дамыту орталықтарының өкілдері бас қосады. Көрерменнің назарына кұрақ құраудың, кілем тоқудың, киізден жасалған бұйымдардың, гобелендердің және дәстүрлі сәндік-қолданбалы өнердің басқа да бұйымдарының бірегей үлгілері ұсынылмақ.
Сондай-ақ «Аламан құрақ – 2026» жобасын өткізу және оны «Global Best of Records» халықаралық рекордтар кітабына енгізу жоспарланып отыр. Одан бөлек, жетекші шеберлер шеберлік сағат өткізіп, тақырыптық көрмелер мен шығармашылық зертханалар, облыстың аудандары мен қалаларының мәдениет қызметкерлері үшін бейінді сарапшылардың қатысуымен материалдық емес мәдени мұра мәселелері бойынша оқыту семинары ұйымдастырылады, — делінген хабарламада.
Фестивальдің концерттік бағдарламасы Қазақстаннан және шетелден келген танымал этникалық музыка орындаушыларын бір арнаға тоғыстырып, сахна төрінде Еділ Құсайынов, Серәлі Мұхамедсадыков, Далайхан Алпамыс, Асқарұлы Зайт және «Қорқыт» , «Барқытбел» этнофольклорлық ансамбльдері өнер көрсетеді.
Шара 15–16 мамыр күндері Солжағалау кешені аумағында өтеді. Кіру тегін!
