Шемонаиха қаласында салынып жатқан жылу қысымын көтеретін жаңа сорғы станциясының құрлысын шілде айында аяқтау жоспарланып отыр, деп хабарлайды F16.kz.
Мемлекет басшысының тапсырмаларын жүзеге асыру шеңберінде әр өңірде халықты үздіксіз жылумен және сапалы ауыз сумен қамтамасыз ету үшін энергетикалық, коммунальдық секторларды жаңғырту бойынша жұмыс жалғасып жатыр. Электр желілері салу және жөндеу үшін облыстық және республикалық бюджеттен қаржы қарастырылған.
Мұндай жұмыстар шекара шебінде орналасқан Шемонаихада ауданында да қолға алынған. Қазіргі күні онда жаңа сорғы станциясының құрылысы жүргізіліп жатыр. Ол жоба жүйедегі қысымды арттырып, жылумен қамтудың сапасын жақсартуға бағытталып отыр.
Кейінгі жылдары қалада жылу тапшылығы жиілеп кеткен. Жылу қоры жеткілікті болғанымен, қуаты жетпегендіктен қиындықтар туындаған көрінеді.
Гидравликалық жүйенің мүмкіндігі жетпеді. Сондықан жылу құбырындағы қысымды көтеру үшін жаңа сорғы станциясын салу туралы шешім қабылданды. Нысан құрылысын шілде айында толық аяқтау жоспарланып отыр. Алдымен сынақ режиімінде іске қосамыз. Одан кейін, жылыту маусымы басталғанда толық қолданысқа берілуге тиіс. Қазіргі уақытта құрал-жабдықтар мен материалдар толық алынып, құрылыс кестеге сәйкес жүргізіліп жатыр, — деді Шемонаиха ауданының құрылыс, сәулет және қала құрылысы бөлімінің басшысы Елдар Темірбеков.
Жаңа сорғы станциясының құрлысы 2024 жылы басталған.
Жұмыстар жоспарға сәйкес толық аяқталса, өткен қыста қоңыр салқын пәтерде электр пешін амалдап шыққан тұрғындар толық көлемде жылумен қамтамасыз етіледі
