Шығыс Қазақстан облысының әкімі Нұрымбет Сақтағанов Алтай, Үлкен Нарын және Катонқарағай аудандарына жұмыс сапарымен барып, су тасқынының алдын алу бағытында атқарылып жатқан шаралардың барысын тексерді, деп хабарлайды F16.kz.
Аймақ басшысы алдымен Алтай ауданына барып, Бұқтырма өзеніндегі бөгеттің жағдайымен танысты. 2001 жылы салынған гидротехникалық нысанның ұзындығы — 2 400 метр, ені — 5 метр, биіктігі — 3,5 метр. Биыл су тасқынына дайындық аясында бөгеттің 200 метрлік бөлігі күшейтілген.
Cонымен қатар ауданда арыөтар тазартылып, Железнодорожная көшесі мен Зубовка өзеніне апаратын канал бойындағы шөптер орылып, су арналары ретке келтірілген. Березовка өзенінің арнасы 700 метрге дейін тереңдетілді. Бұдан бөлек тұрғындар арасында түсіндіру жұмысы жүргізіліп, төтенше жағдай кезінде әрекет ету тәртібі көрсетілген жадынамалар таратылған.
Қазір инертті материал салынған 600 қап дайындалып, қосымша 8 тонна материал қоры жасақталған. Бұқтырма, Березовка, Зеленка және Зубовка өзендеріндегі жағдай күнделікті бақылауда. Өзендердегі су деңгейін бақылау үшін ауданда үш гидробекет жұмыс істейді. Малеевка ауылы маңынан ағатын Бұқтырма өзенінде қауіпті деңгей 580 сантиметр деп белгіленген.
Үлкен Нарын ауданында Сурка өзенінің арнасын ағаштан тазарту, түбін тереңдету және жағалауды бекіту жұмысы жүргізілген.
Катонқарағай ауданының Барлық ауылында Бұқтырма өзеніндегі мұз кептелісінің алдын алу мақсатында жарылыс жұмысы ұйымдастырылған. Аймақ басшысы олардың нәтижесін тексерді.
Өзендерде 1800-ден астам жарылғыш зат пайдаланылып, 21 000 шаршы метр аумақта мұз ұсақталды. Осылайша мұз кептелуіне жол берілмей, елді мекендердегі су тасқыны қаупі азайтылды. Жағдай тұрақты бақылауда болады, – деді Нұрымбет Сақтағанов.
Жалпы, өңірде елді мекендерді су басу қаупін төмендету үшін алдын алу шаралары кешенді түрде жалғасып жатыр.
