Шығыс Қазақстан облысының әкімдігі әлеуметтік желілерде тараған Өскемен қаласындағы құрылысы аяқталмаған автозауыт «0 теңгеге сатылады» деген ақпаратқа қатысты ресми жауап берді, деп хабарлайды F16.kz.
Қазақстан Республикасының қолданыстағы заңнамасына сәйкес, конкурстық рәсімдер аяқталғаннан кейін және комиссияның оң шешімі болған жағдайда, 15 жұмыс күні ішінде мемлекеттік мүлік және жекешелендіру департаменті облыс әкімдігімен келісу арқылы экономикалық орындылығын ескере отырып, мүліктік кешенді мемлекеттік органдардың біріне беру туралы шешім қабылдайды, — деп мәлімдеді ШҚО әкімдігі.
Аталған аумақты мемлекет меншігіне бекіту, оны жүйелі дамытуға мүмкіндік береді: инфрақұрылымды жаңғыртудан бастап жаңа өндірісті іске қосу мен инвестиция тартуға дейін.
Сонымен қатар облыс әкімдігі бұл аумақта арнайы экономикалық аймақ құру мәселесін қарастырып жатыр. Отандық және шетелдік инвесторларды тарта отырып жаңа өндірістерді ашу жоспарланған, бұл заманауи өндірістік кластер қалыптастыруға мүмкіндік береді. Кәсіпкерлікті дамытуға, инвестиция тартуға және жаңа жұмыс орындарын ашуға бағытталған перспективалы аймақ болмақ.
Осы ретте жоспарларды іске асыру үшін нысанның техникалық жағдайына кешенді талдау жүргізу, сондай-ақ инфрақұрылымды қалпына келтіру мен жаңғыртуға қажетті жұмыстардың көлемі мен құнын бағалау қажет.
Естеріңізге сала кетейік, күні кеше сотталған кәсіпкер Анатолий Балушкинге тиесілі болған құрылысы аяқталмаған «Азия Авто» автозауыты бойынша сауда-саттық өткен болатын.
