Ертең, 11 сәуірде Өскеменде «Таза Қазақстан» экологиялық акциясы аясында жалпықалалық сенбілік өтеді. Шараның басты мақсаты – қаланы таза, көрікті және қолайлы өмір сүру ортасына айналдыру, деп хабарлайды F16.kz.
Қала әкімдігі мен ұйымдастырушылар тұрғындарды, мемлекеттік мекемелерді, кәсіпорындарды, шағын және орта бизнес өкілдерін сенбілікке белсенді қатысуға шақырады. Бұл күні өскемендіктер аула аумақтары, тұрғын үйлердің маңы, сауда орындары мен бизнес нысандарының айналасында тазалық жұмысын жүргізеді.
Ұйымдастырушылардың хабарлауынша, тазалық акциясы алдағы 30 мамырға дейін әр сенбі сайын тұрақты түрде жалғасады. Бұл бастама қала аумағындағы санитарлық жағдайды жақсартуға және экологиялық мәдениетті қалыптастыруға бағытталған. Мамандардың айтуынша, әр азаматтың қосқан үлесі қаланың көркеюіне тікелей әсер етеді.
