Бүгін облыс орталығында 800-ден астам кәсіпкерді, сарапшылар мен мемлекеттік органдар өкілдерін жинаған Altay business форумы өтіп жатыр, деп хабарлайды F16.kz.
Аймақ басшысы шара басында әр қала мен ауданнан келген шағын және орта бизнес субъектілерімен, туристік аймақ өкілдерімен танысып, ұсыныстарын тыңдады. Мұнда шағын өндірістен бастап түрлі креативті жобалар ұсынылды.
Altay business форумы бизнес жобасын енді бастаған жас кәсіпкерлердің тәжірибе жинауына септігін тигізеді.
Шара қатысушылары бюрократиялық кедергілерді қалай азайтуға, жобаларды іске қосуды қалай жеделдетуге және бизнесті қалай кеңейтуге болатынын талқылап жатыр.
Шығыс Қазақстан — әлеуеті жоғары өңір. Қазір мұнда елдегі өнеркәсіп өндірісінің шамамен 6%-ы шоғырланған. Инвестиция көлемі 838 млрд теңгеден асады, ал шағын және орта бизнестің экономикадағы үлесі 24,4%-ға жетті. Облыста 58 мыңнан астам ШОБ субъектісі жұмыс істейді, онда 157 мыңнан астам адам еңбек етеді. Бұл экономикалық және әлеуметтік тұрақтылықтың негізі, — деп атап өтті Шығыс Қазақстан облысының әкімі Нұрымбет Сақтағанов.
Сондай-ақ форумға жиналған кәсіпкерлерге «бір терезе» қағидаты аясында мемлекеттік қолдау мен қызметтерді артық рәсімсіз, уақыт жоғалтпай алу жолдары түсіндірілді.
Форум алаңында аквамәдениет, агробизнес, IT, туризм және креативті индустрия сияқты түрлі салала кәсіпкерлері мен сарапшылары пікір алмасып жатыр. Олар өзара тәжірибе алмасып, ұтымды шешімдерін ортаға салды.
