Облыс аумағында 10-14 сәуір аралығында «Қару» республикалық жедел профилактикалық іс-шарасы өтті. Тәртіп сақшылары 300-ден астам қару иесін тұрғылықты жері бойынша тексеріп, 25 әкімшілік құқықбұзушылықтың жолын кесті, деп хабарлайды F16.kz.
Облыстық полиция департаменті таратқан мәліметке сүйенсек, азаматтық қаруды сақтау шарттарына қойылатын талаптарды бұзған 13, қаруды тіркеудің белгіленген тәртібін бұзған 8 жағдай анықталған.
Қару мен оқ-дәрілерді заңсыз сақтағаны және алып жүргені үшін 4 азамат әкімшілік жауапкершілікке тартылды. Қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау және алып жүру фактісі бойынша 2 адамға қылмыстық іс қозғалды, — дейді департаменттің баспасөз қызметі.
Сондай-ақ заңсыз айналымнан 6 атыс қаруы тәркіленген.
Полиция департаменті қаруды сақтау ережелерін қатаң сақтау міндетті екенін ескертеді. Белгіленген талаптарды бұзу заңмен қарастырылған жауапкершілікке әкеп соғады.
